糖尿纏身十年 腳腐爛暴瘦50磅 蘇杏璇歎手尾長
頭條日報 2012年4月18日
資深演員蘇杏璇憑《奪命金》首獲今屆香港電影金像獎「最佳女配角」，好戲之人獲嘉許，個個真心替她高興，只可惜，當晚璇姐只能躺在醫院的病牀接受大家的祝福，未能出席親身攞獎。事實上61歲的璇姐病情不輕，因糖尿病令體重急跌五十磅，瘦到只剩得個頭和一雙眼睛！本月初更因「糖尿腳」搞到行動不便要留院，雖不致要截肢保命，但好友梁安琪也坦言：「佢對腳有啲腐爛，無法瘉合嘅潰瘍需補皮！」暫時要靠輪椅出入，連璇姐也歎句：「今次真係手尾長！」慶幸病情仍可受到控制，真係不幸中嘅大幸。 採訪：方騫平
入住公立醫院超過兩星期的蘇杏璇，計劃頒獎禮當晚可以出院回家，但最終不獲主診醫生批准，要留多兩天照多張X光片，以確定骨無事。蘇杏璇中氣十足接受本報電話獨家訪問，「今次真係手尾長，經過今次大病，以後好番，行得番嘅話我會乖，唔再對個病掉以輕心，過往成日以為自己係女強人，打不死，今次真係得到一個好好嘅教訓。」
諱疾忌醫害苦自己
1996年，蘇杏璇離開服務了24年的TVB，其實當時公司已預備了合約，條件也不俗，只因許成彪丈夫說：「睇死你會返去。」她便賭氣不簽！就算自己健康，蘇杏璇同樣意氣用事。患了十年糖尿病，老公、仔女、朋友無間斷力勸她要睇醫生，對症下藥，她卻愛理不理，在早前的訪問中更直認：「我係曳病人，別人唔准我食甜嘢，我偏偷食。」而且璇姐唔會戒口，想食乜就食乜，最鍾意食蛋糕，完全不顧健康，到頭來，受苦是自己。
「早年睇過醫生，但食過西藥感暈厥便自行停服，轉睇中醫，做針灸。因為一個懶字，記得嘅話，久唔久煲下中藥或者湯水，太忙就唔鬼理，總之自己呃自己，唔當自己係病人，最嚴重是糖尿指數最高去到近200度，簡直爆晒錶！10年間，由150磅急跌至99磅，但勝在有精神，無影響到工作同日常生活，甚至可以拍戲。至三個月大病前夕，開始發覺視力矇查查，血液循環唔好，腳趾傷口又紅又腫，埋唔到口，愈搽藥膏，情況愈差，最後聽老公同朋友勸喻入院。(唔怕好似已離世的羅君左咁搞到要截肢？）係喎，當時又無諗過呢個問題，嗰時個人好似失憶咁，乜都唔去記，唔去理，依家先體會到，病人係要面對現實，旁人絕對幫唔到你！今後我會Take care自己，所以休息三個月後再考慮工作（會唔會息影？）唔敢咁講，一切隨緣，有興趣就做，總之無因為今次得獎，多咗人搵我拍戲。」語畢，她叮囑記者：「你唔好寫得咁詳細，唔好問左腳定右腳，費事啲人留意我隻腳呀！等我好番，我會喺齋舖設宴見吓你哋（傳媒）?。」收到，璇姐保重，我哋一定等你！
梁安琪憂心病況
梁安琪於2010年的一個慈善齋宴上和璇姐結緣，自此成為好朋友。今年年二十九Angel跟璇姐及粉絲齋宴團年，相中的璇姐暴瘦兼神情憔悴，一臉病容，跟以往珠圓肉潤，形成強烈對比，情況令人擔心。Angel說：「佢愈病愈嚴重，但就諱疾忌醫，就算入院前病到氣若游絲，佢仲好堅持話：『你由我啦，我唔想切咗對腳呀，我會好番?！』好彩佢都肯聽老公話入院，目前病情得到控制。」
蘇杏璇歎難做到杜Sir要求
星島日報
獲頒金像獎「最佳女配角」的蘇杏璇，因糖尿病入院未能出席頒獎禮，昨日在查小欣節目上表示以她這個年紀得獎已沒太大喜與樂，加上信佛一切也淡然面對，但不能出席也有點遺憾。
她表示已很少參與電影工作，知足不需要甚麼名利，先後推演了不適合的戲。今次參演《奪命金》是因為與杜琪峯熟絡，不過她自爆拍《奪》好失望，因為久沒演戲，做不到杜Sir的要求，NG了很多次，難以投入角色，難為了對方。問有否被杜Sir罵？她說：「佢猛話咁都演唔到，佢係唯美主義，我唔怪責佢，我好內疚做唔到。」問為何入院？她表示有糖尿病超過10年，由於之前藥力太重，服後暈倒，所以沒再食藥，可能食齋沒甚麼病發，直至兩個月前不適入院。 | 
发表于 2012-4-16 12:35
| 
发表于 2012-4-21 09:17
| 